مەرگی دایکم و رۆحی نامۆی من

من بیری لایلایه‌م نایه‌ ... وه‌ک خه‌و نه‌بێت منداڵێتی خۆمم له‌یاد نییه‌ ... من نازانم چه‌ند هه‌زار جار دایکم ساقه‌سه‌رم بووه‌ ... چه‌ند هه‌زار جار خۆی له‌ ده‌وری سه‌رو باڵام گه‌ڕاندووه‌ ... چه‌ند سه‌دان شه‌و به‌ دیار منێکی بێئاگا له‌ بوون و ژیان دانیشتووه‌و ، ئه‌و شه‌وانه‌ی هه‌تا به‌یان به‌خه‌مباری و فرمێسک رشتن بردۆته‌سه‌ر‌ ... چه‌ند جار نوێژو نزاو هیممه‌تی پیرو پیاوچاکانی به‌ره‌و باره‌گای یه‌زدان ناردووه‌ ، به‌ڵام کاتێك ئه‌هریمه‌نی مه‌رگ یه‌خه‌یگرتوو لێیسه‌ندمه‌وه‌ ، ئه‌وی به‌ره‌و به‌هه‌شته‌که‌ی بڕوای پێیبوو به‌ڕیکردوو ، منیش به‌بێ رۆحی ئه‌و و به‌بێ ره‌گی ژیان له‌م دۆزه‌خه‌ی ناوی دنیای لێنراوه‌ به‌جێمام و ، هه‌موو ساڵێک له‌ ده‌ستپێکی حوزه‌یراندا(1) سوێی ئه‌و مه‌رگه‌ی ده‌متاسێنێ و خه‌یاڵ نوقمی ده‌ریای یاده‌وه‌ری و ئه‌وینی دایکایه‌تی ئه‌وم ده‌کات .

ئێستا وێنه‌ی شیرینی ئه‌و به‌به‌رچاومدا گوزه‌ر ده‌کات ... ئه‌و ده‌بینم ، هه‌تا ده‌ستی ماندوو ده‌بێت رامده‌ژه‌نێ ، به‌ده‌میه‌وه‌و به‌ ئاوازێکی خه‌ماوی " رۆڵه‌ لایلایه‌ .. کۆرپه‌م لایلایه‌ " م(2) بۆ ده‌چڕێ ... ئه‌و ده‌بینم خۆشه‌ویستیی دوو کۆرپه‌ی کۆچکردووی به‌ر له‌ منی(3) پێداوم و ، به‌وه‌ زامی سکی سووتاوی خۆی سارێژده‌کات ... ئه‌و ده‌بینم شه‌و تا به‌یان به‌ ئاگایه‌و په‌یتا په‌یتا گوی به‌ هه‌ناسه‌مه‌وه ده‌نێت ... ئه‌و ده‌بینم خه‌می گه‌وره‌ی ژیانی خۆی منه‌و ، کاتێک په‌نجه‌م گه‌رم ده‌بێت ، ناسره‌وێت و دوعاو نزاو نوێژو رۆژوو بۆ گیانی ده‌رده‌داری من بڕیار ده‌دات ... ئه‌و ده‌بینم له‌ دامێنی هه‌ڵه‌بجه‌دا به‌دیار ( پیر محه‌مه‌د ) ه‌وه‌(4) هه‌ڵترووشکاوه‌و داوای مان و ته‌مه‌ندرێژی بۆمن لێده‌کات .

تۆ ... تۆ ... ئه‌ی رۆحه‌ نامۆکه‌ی هه‌تا مه‌رگ  ، هه‌ر رۆژه‌ بۆ جگه‌رگۆشه‌یه‌کت نامۆییت نوێده‌بووه‌وه‌و ، دواجاریش به‌ نامۆیی ( فه‌همی ) یه‌وه‌(5) سه‌رتنایه‌وه‌ .

تۆ ... تۆ... ئه‌ی ئه‌و ژنه‌ میهره‌بانه‌ی وه‌ک دایکانی کوردستانم ،  دایکایه‌تیت به‌دوا لوتکه‌ گه‌یاندو له‌ رۆژه‌ سه‌خته‌کاندا هاوکاری تێکۆشان و په‌رژینی نهێنییه‌کانم بوویت .

تۆ ... تۆ... ئه‌ی ئاوازی هه‌ستی ناسکی خۆبه‌خشانه‌ی دایکایه‌تی که‌ به‌ یادت دیمه‌نه‌ ساکارو دڵفڕێنه‌کانی منداڵێتیم بۆ دێته‌وه‌و هه‌ستی پاکی منداڵێتی له‌ ناخمدا ده‌بزوێنی .

تۆ ... تۆ ... ئه‌ی قوتابخانه‌ی جوانترین نه‌ریتێک که‌ به‌ وانه‌ی سه‌ربه‌رزی و راستگۆیی و دڵسۆزی و پاکی گۆشتکردم .

تۆ ... ئه‌ی دایکه‌ شه‌که‌ته‌که‌ی ئه‌م ژیانه‌ی سه‌رانسه‌ری نامۆیی بوو ، دڵنیابه‌ دنیای نه‌بوون تۆ له‌ یادم ده‌رناکات و ناتوانێت روخسارو رۆحت له‌ ناخمدا بسڕێته‌وه‌ ....

په‌راوێزه‌کان

• 1) مه‌به‌ست رۆژی مه‌رگی دایکمه‌ که‌ رێکه‌وتی 2 / حوزه‌یران / 2000 ده‌کات .
• 2) به‌یتێکی فۆلکلۆرییه‌ ژنانی کورد به‌ئاوازه‌وه‌ بۆ کۆرپه‌کانیانی ده‌ڵێن .
• 3) به‌ر له‌ دایکبوونی من خوشکێک و برایه‌کم له‌ ته‌مه‌نی پێنج ساڵی و سێ ساڵیدا له‌ ماوه‌ی سێ مانگدا مردوون . ئه‌و کاته‌ ماڵمان له‌ شاری هه‌ڵه‌بجه‌ بووه‌ .
• 4) پیر محه‌مه‌د شه‌خسێکه‌ ده‌که‌وێته‌ دامێنی شاری هه‌ڵه‌بجه‌وه‌ ، دایکم به‌ر له‌ بوونم و دوای ئه‌وه‌ش به‌رده‌وام سه‌ردانی کردووه‌ به‌ نیازی ئه‌وه‌ی منی بۆ بمێنم و له‌ نه‌خۆشی و ده‌ردو به‌ڵا به‌ دووربم .
• 5) مه‌به‌ست ( فه‌همی قه‌ره‌داغی ) برامه‌ که‌ به‌دوای مندا هاتووه‌و ، له‌ شاری هه‌ڵه‌بجه‌ له‌دایک بووه‌ . ( فه‌همی ) ی نووسه‌رو رۆژنامه‌نووس ساڵی 1980 له‌لایه‌ن ده‌زگا سه‌رکوتکه‌ره‌کانی به‌عسه‌وه‌ گیراو بێسه‌روشوێنکرا .

فوئاد قه‌ره‌داغی

سلێمانی  2 / حوزه‌یران / 2008  ‌

9:25 - Monday, June 2, 2008 - بۆ چوون

Powered By kurdblogger